香港台式火鍋店

今個冬天忙到好少打邊爐，今日初七嚟到呢間台式火鍋滾滾先。台灣火鍋通常只會諗到鼎王、無老鍋等，唔知呢間位於香港嘅《老鍋》又會係點呢？

裡面裝潢有點似台灣火鍋店，中式屏風、燈籠嘅擺設，真係令人好想跑去台灣一趟。位置都算寬敞，唔會太逼，三五知己嚟聚會都唔錯。

講咁耐……係時候睇下餐牌先。位於尖沙咀地帶所以價錢都算合理，不過我地係21:30後到，宵夜時段有7折，新年流流獎勵下自己都唔過份。

火鍋最重要就係要湯底正，餐牌上有4款選擇。經常捱夜嘅我地……最後揀左養生鍋補一補先。湯底由藥材、人蔘、金華火腿、豬肉等而製成，味道清甜，好味！內裡更好似台灣火鍋店一樣都已經放有鴨血同蜂巢豆腐，而鴨血更係從台灣運過嚟，因為香港都已經甚少有工場製造了，所以更加增添不少台灣風味。

其次都要睇下火鍋料新唔新鮮，整體都唔錯。最驚喜係響鈴同炸午餐肉真係即點即炸，午餐肉仲要炸到咁金黄，未放入鍋都忍唔住口食番舊。

另一驚喜手打梅菜豬肉丸，口感都幾彈

其他火鍋料都不錯

鍾意另類邊爐（吸煙）嘅朋友唔駛愁，老鍋設有露台位置，既可以食住火鍋又可以打住邊爐 （吸煙）。加上營業時間到凌晨2:00，好啱夜鬼嘅朋友。